Македонското радио ќе се модернизира годинава

Комплетно опремување и реновирање на Македонското радио во текот на годинава, најави директорот на МРТ, Марјан Цветковски на Светскиот ден на радиото. По неколку децении, застарената техника ќе биде заменета со нова. Целта е да им се овозможи на слушателите квалитетна програма, а на вработените подобри услови за работа.

„Во 2025-та, конечно после многу години, Македонското радио ќе добие комплетно опремување, ќе се реновираат сите студија, сите режии, но и техниката која е стара повеќе од 30-40 години, за среќа и на вработените и на слушателите, ќе биде променета оваа година“, нагласи директорот на МРТ, Марјан Цветковски.

По повод 80-годишнината од постоењето на Македонското радио и меѓународниот ден, радиото го посети претседателот на Собранието, Африм Гаши. Новинарите кои ја подготвуваат програмата на спикерот му приредија изненадување потсетувајќи го на времето кога бил дел од рап-бендот „Празни џебови“.

Гаши најави поддршка за развојот и модернизацијата на радиото бидејќи Собранието е негов основач. Радиото е од државен интерес потенцираше тој, бидејќи покрај информативната има и други значајни функции.

„Сакавме да покажеме дека Собранието, како една од најглавните институции во државата дава поддршка на Македонската телевизија и радио, затоа што тоа е државен интерес. Македонското радио и телевизија имаат и едукативна, интелектуална, културна и секаква друга димензија, и затоа ние треба да дадеме максимална поддршка на развојот на МРТ“, изјави претседателот на Собранието, Африм Гаши.

Македонското радио емитува образовни, музички, забавни и информативни емисии. Првата програма покрај во Македонија, се слуша и во соседните држави.

Александра Велинова