Сезонскиот грип го достигнува пикот

Сезонскиот грип го достигнува пикот. За една недела, регистрирани се 2.880 заболени, за пет проценти помалку од претходната. Децата најмногу на удар. Вирусот е распространет низ целата држава, особено во Скопје. Во споредба со лани, истиов период, има зголемување од 50 насто.

„Се забележува зголемување на бројот на заболени слични на грип кој е над неделната граница за средна активност. Резултатите добиени од вирусолошкиот надзор над инфлуенцијата покажуваат дека има широка географска активност на вирусот на грип, а процентот на позитивност е над границата од 10 проценти пет недели по ред. Согласно достапните податоци, Македонија има висок интензитет на вирусот на грип во овој период“, изјави Марија Андоновска – директорка на Институтот за јавно здравје.

Грипот ги полни клиниките. Во амбулантите на Детска и во болницата „Козле“ лекарите прегледуваат и по 200 деца за едноденоноќие, има и хоспитализирани. Надлежните апелираат на превенција. Комисијата за заштита од заразни болести со препорака да се забранат посетите во болниците.

Вакцинацијата е најдобрата заштита од сезонски грип. Лекарите велат, штити од тешки форми на болеста, хоспитализација и од смртен исход. Годинава вакцина против грип во земјава примија повеќе од 70 илјади граѓани.

Од почетокот на сезоната, од грип заболеа околу 11.600 граѓани. Регистрирани се и два смртни случаја.

Андријана Ѓурческа