Нови вработувања во здравството, најави Таравари

Почнува вработувањето на приватните специјализанти. Од 108 здравствени установи, 20 ги завршиле систематизациите и можат да дадат решенија, преостанатите ќе треба да ja почекаат систематизацијата од министерството за администрација. Од првите 300 специјализанти, најмногу решенија за работа ќе добијат кардиолозите и гинеколозите, уверува министерот за здравство. До крајот на годината се очекува да има речиси 1800 вработувања, лекари и средно-медицински персонал.

„Од 108 јавно – здравствени установи кои подготвуваа нови систематизации, 20 се веќе подготвени и можат веднаш да почнат да ги вработуваат првите 300 специјализанти, останатите ги чекаат да дојдат новите систематизации од министерството за администрација. Само во Скопје, околу 30 специјализанти гинеколози ќе бидат вработени во јавните здравствени установи со првата група приватни специјализанти“, изјави министерот за здравство, Арбен Таравари.

Во поликлиниката „Бит-пазар“ отворен дежурен педијатриски пункт. Деца со полесни симптоми ќе се прегледуваат во ноќните часови, а ќе се прават и лабораториски анализи. Целта е да се намали притисокот на детските клиники.

„Се отвори нов специјалистички педијатриски пункт што ќе работи секој ден од 19.30 – 7.30 и во недела 24 часа. Ќе се прегледуваат деца под 14 години. Тимот ќе се состои од специјалист педијатар, медицинска сестра и лаборант. Ќе се вршат општ преглед, лабораториски анализи на крв, урина, ЦРП“, изјави Самир Исени, директор на Здравствен дом – Скопје.

Доколку има педијатри кои се подготвени да дежураат, здравствените власти вакви пунктови ќе се отворат и во другите поликлиники.

Андријана Ѓурческа