Голем туристички бран на охридско- струшкото крајбрежје

Беа потребни само 24 часа по подобрувањето на временските услови за Охрид да се исполни со туристи и да го оправда епитетот-најголем македонски туристички центар.

Уште еднаш се потврди дека градот под Самоиловата крепост е брендот на македонскиот туризам, каде што се сместени најатрактивните и најпривлечни хотелско-угостителски објекти, а безпредметно е да се говори за убавината на езерото и плажите.

Денеска ве водиме на една од најубавите плажи на охридското крајбрежје, плажата Потпеш која се наоѓа под црквата Свети Јован Канео, по која Охрид е препознатлив во светот.

Турист од Србија вели: „Девет години со ред доаѓам во Охрид, откако го открив не сум отишол на море“.

„Доаѓам овде веќе триесет години. Овде е прекрасно, храната е добра, а домаќините се пријатни. Ќе дојдам повторно бидеќи Охрид е нешто посебно“, вели туристка од Словенија.

Покрај во бистрата езерска вода гостите се разладуваат и со пијалоци.Најомилени се коктелите.

„Странските гости што се на плажата ги обожаваат коктелите со вкусовите на Мохито, од јагода и од малина, тие се многу добри и многу барани, а исто така во нив можам да го вклучам и Бахама Мама“, вели барменот Иван Лотески.

Иако јули не помина според очекувањата хотелиерите се надеваат дека вкупната туристичка сезона ќе биде најмалку на минатогодишното рамниште.

Сашо Нелоски