Човечка грешка-причина за судирот

Системите за сигнализација на пругата на железничката станица „Рајко Жинзифов“  каде што синоќа се судрија патнички и товарен воз функционирале беспрекорно. Ова го покажала првичната анализа по направениот увид на екипите на „МЖ Транспорт и Инфраструктура“. Човечка грешка најверојатно е причината за несреќата во која нема повредени.

Патниците кои патувале со возот кој сообраќал на релација  Скопје - Гевгелија, велат „на станицата Рајко возот  додека стоешe,  покрај него помина товарниот. По кратко време тргна патничкиот  и потоа се случи несреќата, изјавија очевидците за МРТ.

Познавачите на ваквите состојби велат дека е среќа што патничкиот воз се движел многу бавно, па од ударот дошло до извртување на еден товарен вагон и изместување на два, а по инерција од ударот на останатиот дел од вагоните се лизнала и локомотивата. Колкав материјалната штета е причинета, дополнително ќе се утврдува.

Железничкиот сообраќај кон Скопје сеуште е во прекин. Се работи на оспособување на пругата по која дневно минуваат по триесетина воза. Информациите од Македонски Железници се дека сообраќајот вечерва ќе биде нормализиран.

Новинар:  Дијана Иванова

Снимател:  Никола Василков