Трамп: Прво договор, па разговори за мировни сили

Американскиот претседател Трамп вели дека договорот за минерални суровини е безбедносната гаранција што му е потребна на Киев. Русија ќе размисли двапати пред да ја нападне Украина доколку САД стават економски печат за да извлечат критични минерали од украинските рудници, уверува шефот на Белата куќа. На средбата со британскиот премиер Стармер истакна дека прво сака да се постигне договор за прекин на огнот, пред да се разговара за распоредување на мировни сили во Украина.

„Договорот за минерали за кој сите велеа дека е тешко да се постигне, навистина е многу добар за Украина и добар за нас. На американските даночни обврзници сега ќе им бидат вратени парите, а стотици милијарди долари ќе се вложат за да ѝ се помогне на Украина да се одбрани, што само по себе е многу достојна работа од која било друга поддршка што ја плативме во нашата земја. Дополнително, договорот за минерали ќе обезбеди основа за поодржливи идни односи меѓу САД и Украина и ќе го стимулира долгорочниот просперитет што ќе им помогне на Украинците да ја обноват својата земја“, изјави Доналд Трамп, претседател на САД.

Американскиот и украинскиот претседател денеска ќе се состанат во Вашингтон за да го потпишат договорот за минералните руди. Зеленски истакна дека успехот на договорот ќе зависи од разговорите, нагласувајќи дека сака да знае што ќе се случи со неговата земја. Претходно Путин ги предупреди „западните елити“ да не се обидуваат да го саботираат потенцијалното приближување меѓу Русија и Соединетите држави.