Од вторник царини за Канада и Мексико

Покрај удвојувањето на универзалната тарифа од 10 насто за увоз од Кина, Трамп планира да воведе царини за Канада и Мексико од вторник поради илегалната миграција и трговијата со опасната дрога фентанил. Канадскиот премиер Трудо рече дека неговата земја инвестирала повеќе од една милијарда канадски долари за подобрување на граничната безбедност, додавајќи дека министрите и официјалните претставници се во Вашингтон оваа недела.

„Помалку од еден процент од фентанилот што пристигнува во соединетите држави доаѓа од Канада, но знаеме дека дури и тоа треба да се намали. Инвестиравме 1,3 милијарди долари во зајакнувањето на нашите гранични капацитети. Одиме во Вашингтон за да покажеме дека ова е прашање на кое треба да работиме заедно и дека Канада не е извор на проблеми за соединетите држави. Ќе направиме се што е потребно за да избегнеме спроведување на овие тарифи. Како што реков, ако во вторник се воведат неоправдани тарифи за Канада, ќе имаме моментален и исклучително силен одговор како што очекуваат Канаѓаните“, изјави Џастин Трудо, премиер на Канада.

Трамп претходно се согласи на 30-дневна суспензија на тарифите во Канада и Мексико, кои првично требаше да започнат во февруари. Шефот на Белата куќа не отстапува ниту од царините за ЕУ од 25 насто.