Штрајк на аеродромите во Германија, откажани летови
Германскиот синдикат на аеродромските работници на штрајк. Околу 3.400 летови се откажани. Штрајкот се одржува во екот на годишните преговори за платите и условите за работа на аеродромите...
Хаос на аеродромите во Германија. Синдикатот на аеродромските работници почна со 24-часовен предупредувачки штрајк по неуспехот во вториот круг преговори за колективниот договор за труд. Околу 3.400 летови се откажани. 13 аеродроми парализирани, вклучувајќи ги и најголемите центри во Франкфурт и Минхен. Синдикатот се надева дека на овој начин ќе успее да изврши притисок и да го добие бараното зголемување на месечните плати за работниците за 8 насто, односно најмалку 350 евра.
„Се надевам дека ќе добиеме разумна понуда. Очекуваме корекции за плати во јавниот сектор, условите за работа и за безбедноста на авиосообраќајот. Колегите денеска штрајкуваат и очекуваме работодавачите да направат отстапки. Ако имаме разумна понуда и можеме да постигнеме договор, сето ова ќе биде готово“, изјави Матијас Венема од синдикат „Верди“.
Заглавените патници на аеродрoмите, нервозни и бесни. Дел од нив ја разбираат легитимноста на штрајкот, но не го криеја разочарувањето поради неизвесниот исход од чекањето.
„Ова е дрско и бесрамно однесување кон сите патници кои утрово се блокирани овде и воопшто не знаат како да продолжат понатаму“, изјави Фреди Шмит, патник.
„Разбирам кога штрајкуваат, што сакаат и за што се борат, но тешко е кога си зависен од летот и треба да организираш сè“, изјави патничка од Колорадо Спрингс, САД.
„Требаше да тргнеме во 9:30 часот. Но, не успеавме. Сега седиме овде, се обидуваме да ги сочуваме нервите за да не полудиме. Чекаме да видиме дали ќе ни успее“, изјави патничка од Хамбург.
Во штрајкот се вклучени околу 5.000 државни и локални аеродромски работници и 23.000 други даватели на услуги за воздушен транспорт. Тие велат дека ги разбираат патниците, но дека ова е единствен начин за разумен договор.
„Знаеме дека тоа е огромен товар за патниците. Но, мораме да штрајкуваме за да добиеме разумна понуда за преговори“, изјави Ларс Стубе од синдикат „Верди“.
Следната рунда преговори е закажана за 26-ти и 27-ми март. Федералната асоцијација на компании за безбедност на авиокомпании силно ги критикуваше штрајковите, сметајќи ги како доказ за претерувања на синдикатот.
Бојана Крстевски