СДСМ бара лидерска средба со владејачките партии, договор сè уште нема

Социјалдемократите ниту демантираат ниту потврдуваат, дали претседателот Филипче на лидерската ќе оди со предлог до партиите – заеднички независен кандидат за градоначалник на Кочани. Од СДСМ кусо одговорија дека е потребна ваква средба за трагедијата, но и за други теми, откако министерот за здравство Таравари рече дека лидерска средба во моментов е непотребна и е губење на време.

„Не би влегувал во таков вид на политикантство, за избори прерано е да размислуваме“, вели премиерот Мицкоски. Прифаќа средба со Филипче за да ги слушне неговите планови.

Опозициските СДСМ и ДУИ не се задоволни од истрагата за трагедијата во Кочани и побараа да се формира анкетна комисија. Интегративците отидоа чекор понатаму и со допис го известија и Советот на Европа.

Мицкоски со став дека е подготвен да разговара и дебатира не само за случувањата во Кочани, но истрагата да се прошири и за другите трагични инциденти од минатото. Претседателот на Владата вели дека истрагата ја вршат истите обвинители избрани во владата на СДСМ и ДУИ. Социјалдемократите и денес побараа оставка од Тошковски и од раководството на БЈБ.

Викторија Милевска