Кошаркарите очекуваат успешен старт на квалификациите

 

„Не сум работел со подобра група на луѓе. Сум работел со поквалитетни кошаркари, но ова се најдобрите момчиња што до сега сум ги тренирал“, - истакна нашиот нов селектор, Александар Џикиќ. „Ако го одработиме она што го планираме, мислам дека успехот против Белгија нема да изостане. Тоа е една силна и атлетски добро подготвена репрезентација. Против Белгијците може да се игра само до коска и никако поинаку. Сите кошаркари ќе добијат шанса, затоа што ова се натпревари што не се добиваат со индивидуален учинок, туку со тимска игра. Неизвесно е дали Дамјан Стојановски ќе истрча, но сигурно е дека Бојан Крстевски нема да настапи“ - рече српскиот стратег.

 

Скромен во изјавите (но жесток на теренот), како и секогаш, капитенот Војдан Стојановски кој што природно се наметнува како лидер на оваа нова македонска кошаркарска генерација, кратко сумираше: „Сигурно дека ни недостасуваат искуството и квалитетите на оние кошаркари што ги нема со нас, а што ги гледавме во минатото, знаеме кој се недостасува, но ние сме сложна група, работиме напорно и мислам дека ако дадеме се од себе ќе успееме да се пласираме не европското првенство“.

 

Македонија ги почнува квалификациите в недела од 20:30, против Белгија. Следува серија од три гостувања, кај Данска, Белорусија и кај Белгијците, по што завршуваме дома против Данска и Белорусија. Првиот натпревар може да се покаже како клучен за исходот на овие квалификации, но и не мора да значи. Дури и со два пораза од (на хартија фаворитот) Белгија имаме шанса за пласман на континенталното првенство, затоа што освен победниците на групите, директен пласман ќе изборат и 6 најдобри второпласирани репрезентации од 7 квалификациски групи.

 

Ќе констатираме дека оваа Македонија има и тоа каков потенцијал, за освојување на првата позиција во групата Д и за директен пласман на Евробаскет 2015, без да чекаме на некакви математички исходи од другите групи. Не смееме да размислуваме на никакви порази и пермутации, мора да го дадеме најдоброто од себе во овој квалификациски циклус, во кој што очекуваме конечно да видиме колку знаат оние што до сега беа епизодисти и да блеснат некои нови македонски кошаркарски ѕвезди.