Пакет поволности за изградба на старечки домови и приватни градинки

55 приватни домашни и странски фирми досега пројавиле интерес за изградба на старски домови. За изградба на приватни градинки се заинтересирани 28 претприемачи. До нови приватни детски градинки и домови за стари лица преку пакет поволности – градежно земјиште со почетна цена од евро по квадрат, 95% попуст на комуналиите, поволни кредити од Македонската банка за поддршка и развој, помош од Агенцијата за вработување.

„Овие две поволности можат да бидат користени како од оние субјекти кои допрва се решаваат да влезат во дејноста, да изградат објекти и да стопанисуваат со него, така и од оние установи кои се веќе формирани од приватниот капитал“, рече Александар Ѓорѓиев, портпарол на владата.

Издвоени се 35 локации погодни за изградба на приватни домови за стари лица и 55 објекти за реконструкција, како и 23 локации за приватни градинки и 14 објекти  кои со определни интервенции можат да бидат адаптирани за детски градинки.

„Постои сериозен прогрес како во поглед на обезбедувањето на локации и објекти така и во поглед на големиот интерес што го покажуваат претприемачите, односно приватните стопанственици за влез во оваа дејност“, рече Александар Ѓорѓиев, портпарол на владата.

Во тек е оглас за продажба на земјиште за изградба на приватен старски дом во општина Илинден, кој трае до 18-ти август, а наскоро ќе бидат распишани и огласи за една зграда во Пехчево, Неготино, Богданци. Во општина Аеродром постапката за продажба на државно земјиште за изградба на приватен старски дом е веќе завршена. За изградба на приватни детски градинки, наскоро треба да се распишат огласи во општините Гостивар, Аеродром, Центар Жупа, како и во Битола.

Секој оној кој има интерес да почне ваков бизнис може да ги погледне податоците што се објавени на интернет страницата на министерството за труд и социјална политика.

Ана Јосифоска Тодоровска