ССМ: Работничките права во приватниот сектор мора да се подобрат, итно да се зголемат платите
Синдикатот бара итно да се зголемат платите на работниците, во спротивно предупредуваат дека подготвениот кадар ќе си замине од земјава. Потсетуваат дека потребни се достоинствени плати и безбедни услови за работа...
Итно зголемување на платите за работниците како во јавниот, така и во приватниот сектор, бараат од Сојузот на синдикати. Во спротивно, велат, ќе останеме и без кадар и без луѓе. Потпретседателот на ССМ потсети дека приватниот сектор е главен двигател за економската состојба на државата, па затоа мора да се засили со квалификуван кадар и младина.
„Но, за овие две работи, потребни се достоинствени односно безбедни услови за работа и повисоки плати. Повисоки плати не се 500 евра плата, туку 500 евра минимална плата која ќе се множи со коефициентот на сложеност и со тоа ќе пораснат и останатите плати“, велат од ССМ.
Синдикатот смета дека за добар дел од дејностите од приватниот сектор, не треба да има плати под 50.000 и 60.000 денари. Барањето се однесува на газдите кои често се изјаснуваат дека нема стручен кадар.
Паралелно, калкулацијата на минималните трошоци е показател дека на луѓето не им стигнуваат ниту две и пол минимални плати за да го истуркаат месецот, затоа е барањето за раст на минималецот на 500 евра, но и зголемување на сите останати плати за 100 евра.
Борис Грујоски