Бајовски: Радиоактивниот фон во РЕК Битола не е многу поголем од природниот

Последните мерења на радиоактивниот фон во РЕК Битола покажаа дека тој не е многу поголем од природниот, потврди директорот на Дирекцијата за радијациона сигурност, Зоран Бајовски. Според него, мерењето во 2024-та година, но и сега од страна на еден од техничките сервиси утврдиле дека зрачењето е во дозволените граници.

„Мислам дека беше помалку од 5.000 нанохири, но не ме држете за збор, да не шпекулираме со бројки. Природниот фон го имаме и тука надвор, ние сме и сега изложени на јонизирачко зрачење и тоа е во граници на нормала, којшто не е штетен за нашиот организам. Сите работници коишто се професионално изложени според закон во Република Македонија мора да носат лични дозиметри. Тие дозиметри се вчитуваат на месечно ниво и извештаите ги добиваме ние како Дирекција. Дозволените граници се 0,9 микросиверт“, вели Бајовски.

Во делот на инспекцискиот надзор, Дирекцијата лани спровела 151 редовна контрола, 22 вонредни контроли и 51 контролирана контрола, односно на веќе издадени дозволи. Од вкупниот број на извршени инспекции, кај 61 правно лице е најдена неправилност, а со нив се постапува со оглед на законските рамки.

Мината година издадени се вкупно 237 лиценци и дозволи на стоматолошки ординации, радиотерапија, радијациона рендген дијагностика, нуклеарна медицина, производство на радиофармацевтици, како и индустриска радиографија.

Марина Стојанова-Тонева