Се чистат зелените површини низ општините во земјава
Ученици, волонтери, граѓани ги чистат зелените површини низ општините во земјава. Во Куманово акцијата се реализира по петти пат. Но, освен организирано има граѓани кои и сами покренале иницијатива и го разубавиле својот простор...
Почисто, позелено, поурбано, е мотото коешто ги водеше над стоте ученици, волонтери, екипи на јавното претпријатие „Чистота и зеленило“, кои се вклучија во акцијата „Генералка викенд“. Куманово во оваа акција учествува по петти пат.
Целта е да се крене свеста за собирање и рециклирање на отпад. Се уредуваа зелениот простор кај градскиот базен, спортската сала, објектот на градинката „Ангел Шајче“. Од „Чистота и Зеленило“ со апел, да ја чуваме животната средина, но и да не се уништуваат садовите за смет.
„На почетокот генералка беше исмејувана од страна на најголемиот дел од општините но денес го гледаме резултатот а резултатот е подигнување на свесноста на граѓаните да разберат дека животна средина зависи од нас самите и самите ја одржуваме чистота во нашиот град а првенствено сето тоа почнува од нашите дворови“, истакна директорот на ЈП Чистота и зеленило Куманово, Ненад Стојановски.
Но освен во акцијата, граѓани од поголемите станбени единици, самоиницијативно започнале да ги чистат комплексите. Има и такви коишто направиле свои катчиња.
Општина Куманово е меѓу првите општини, кои се вклучија во оваа акција на иницијатива на невладина организација. За прв пат беше организирана во 2021 година, а е поддржана од Министерството за животна средина и Министерството за земјоделство, шумарство и водостопанство, како и од „Национални шуми“.
Елена Георгиевска