Светот одбројува до утрешната средба во Истанбул каде што треба да почнат преговорите за крај на војната во Украина

На ден пред мировните разговори меѓу Москва-Киев во Турција, нови руски напади врз енергетски објект во Харков. Додека сите чекаат одговор за прекин на огнот и директни преговори, Русија одговара со нови напади-Зеленски со осуда.

„Притисокот е неопходен за Москва да престане да мисли дека светот сè уште може да чека. Потребен е крај на војната – достоинствен и праведен. Русија опширно зборува за директни преговори, но кога ќе дојде до тоа, се крие. Путин одлучува за сè во Русија. Ова е негова војна, затоа преговорите мора да бидат со него“, изјави Володимир Зеленски, претседател на Украина.

Кремљ и натаму не потврдува дали Путин ќе седне на маса со украинскиот колега, но соопштија дека испраќаат руска делегација во Истанбул. Според медиумите, разговорите би можеле да ги водат Лавров и Ушаков.

„Руската делегација ќе биде во Истанбул на 15-ти мај и очекува украинската страна да пристигне таму“, изјави Дмитриј Песков, портпарол на Кремљ.

ЕУ одобри нов пакет санкции за Русија, со кои се ограничува „нафтената флота во сенка“, додека Европа се заканува со натамошни казни ако Москва не се согласи на примирје во Украина. Не сакаме да почнеме трета светска војна-изјави францускиот претседател Макрон.

„Прекинот на огнот е тоа што овозможува најдобра хуманитарна ситуација и почеток на разговори што ќе овозможат решавање на територијалните прашања. Тие сакаат прекинот на огнот да се дискутира во Турција. Доколку се потврди непочитувањето, ние сме решени да воведеме санкции во наредните денови, во договор со САД“, изјави Емануел Макрон, претседател на Франција.

Путин засега не потклекнува под зголемениот притисок од меѓународната заедница. Вели дека работите ги прават на сопствена штета.

„Нема да не заплашат овие нови можни санкции. Стравот не е опција. Кој и да почне да паничи, веднаш ќе изгуби сè. Тие прават многу работи на сопствена штета“, изјави Владимир Путин, претседател на Русија.

Трамп, пак, останува оптимист за утрешната средба. Најави дека американскиот државен секретар Марко Рубио, заедно со Виткоф и Келог ќе присуствуваат на разговорите кои според него би можеле да донесат добри резултати. Ова ќе бидат први директни преговори меѓу Русија и Украина од 2022-та, иницирани од Путин како одговор на зголемените западни барања Русија да се согласи на 30-дневен прекин на огнот како чекор кон потајниот мир.

Бојана Крстевски