Државниот врв со честитки по повод Денот на сесловенските просветители
Претседателката Сиљановска-Давкова повика да се гордееме со нашето културно и духовно наследство, да го чуваме, збогатиме и да им го предадеме на идните генерации. И премиерот Мицкоски потсети дека светите браќа ја промовирале визијата дека силата на еден народ и држава е во образованието, науката и неговата писменост...
Државниот врв и партиите со честитки до граѓаните по повод денот на сесловенските просветители. Претседателката Сиљановска-Давкова повика да се гордееме со нашето културно и духовно наследство, да го чуваме, збогатиме и да им го предадеме на идните генерации.
„Славејќи ги делата на светите браќа, да ја зацврснеме нашата заложба за градење на општество засновано врз знаење, меѓусебно почитување и достоинство“, вели претседателката.
Собранискиот спикер Гаши вели оти Собранието е посветено на унапредување на образованието, културата и јазичната разноликост, како суштински вредности на едно демократско и напредно општество.
И премиерот Мицкоски потсети дека светите браќа ја промовирале визијата дека силата на еден народ и држава е во образованието, науката и неговата писменост.
„Нашата заложба е преку образованието кое е темелот за опстанок и развој на една држава, да создаваме идни генерации кои ќе продолжат да ги негуваат вредностите на Македонија“, напиша Мицкоски.
Лидерот на СДСМ, Филипче, пак, вели дека светите Кирил и Методиј се темел на нашиот македонски идентитет, јазик и култура, и оти имаме обврска да го почитуваме и негуваме нивното наследство.