Стојанче Ангелов нов в.д. директор на ДЗС – најавено спојување со ЦУК во една институција

Стојанче Ангелов е именуван за вршител на должноста директор на Дирекцијата за заштита и спасување (ДЗС), откако по договор со премиерот Христијан Мицкоски беше разрешен од позицијата директор на Центарот за управување со кризи (ЦУК).

Ангелов најави дека ќе работи на обединување на двете институции – ЦУК и ДЗС – во еден современ и функционален систем за управување со кризи и заштита и спасување, кој ќе биде целосно усогласен со стандардите на ЕУ и НАТО. Ова, како што вели, е дел од стратешките заложби на Владата.

Тој посочи дека ДЗС се соочува со сериозни предизвици – недостаток на пилоти, проблеми со сервисирање на ер тракторите, немање договори со тимови за брз одговор, како и недоволен број обучени инспектори и специјалисти за неексплодирани средства, а дел од опремата и кадрите не се соодветно распределени.

Ќе направам сѐ што е потребно ДЗС конечно да заживее како функционална институција, изјави Ангелов, упатувајќи благодарност до премиерот и Владата за укажаната доверба.