Самит на АСЕАН во Куала Лумпур

Светската економија и предизвиците со нестабилната трговија по наметнатите царини од американскиот претседател Трамп, во фокусот на 46-от самит на земјите од југоисточна Азија. Лидерите на АСЕАН бараат начини за надминување на економските шокови откако шест од десет азиски земји беа најтешко погодени од високите тарифи на САД. Годинашниот претседавач со самитот, малезискиот министер за надворешни Мохамед Хасан, изрази загриженост поради глобалната економска неизвесност.

„Мораме да се обединиме за да одговориме на потенцијалните последици од глобалните трговски нарушувања. Со кохезија и солидарност и стратешка автономија како една заедница, овој колективен напор ќе му овозможи на АСЕАН да ги надмине предизвиците и минимизира негативното влијание врз нашите земји“, изјави малезискиот министер на надворешни работи, Мохамед Хасан.

Малезискиот премиер Анвар Ибрахим, пак, во воведното обраќање побара да се направат напори за разговори со американскиот претседател Трамп во обид да се издејствува намалување на царинските стапки кои сега се движат од 10 проценти за Сингапур до над 40 насто за Лаос, Виетнам и Камбоџа. Нагласувајќи ја потребата за солидарност, малезискиот министер за трговија побара заемна поддршка на земјите од АСЕАН и билатерални преговори за справување со предизвиците.

„Секоја земја е суверена нација, затоа, дефинитивно ќе се поддржуваме едни со други во АСЕАН за да ги продолжиме нивните билатерални преговори. Продолжуваме да стоиме зад принципите на мултилатерализмот, каде што веруваме во мултилатералниот трговски поредок базиран на правила“, малезискиот министер за инвестиции, трговија и индустрија, Тенгку Зафрул Азиз.

На самитот на Асеан во Куала Лумпур присуствува и кинескиот премиер Ли Кечијанг и лидерите на Советот за соработка на Персискиот залив во кој членуваат Бахреин, Кувајт, Оман, Катар, Саудиска Арабија и Обединетите Арапски Емирати.

Маја Стојанова