Азир Алиу е предлогот на „Вреди“ за нов министер за здравство
Поранешниот министер за информатичко општество и администрација, Азир Алиу, е предлогот на „Вреди“ за нов министер за здравство. Арбен Фетаи останува вицепремиер за добро владеење. По синоќешниот партиски состанок, од „Вреди“ информираа дека за ова е веќе известен и премиерот Мицкоски...
По седницата на Централното претседателство на „Вреди“, одлучено Азир Алиу да биде нивен предлог за нов министер за здравство, а Арбен Фетаи да биде вклучен во партиското раководство и ќе остане вицепремиер за добро владеење. Десетмина од Алијанса веќе се вклучени во органите на „Вреди“.
Првиот вицепремиер Меџити верува во менаџерските капацитети на Алиу во водењето на ресорот здравство, иако станува збор за доктор, но по информатички науки.
Собранискиот спикер Африм Гаши вели, собраниското мнозинство е стабилно. Кога предлогот за Алиу како нов министер за здравство ќе пристигне во Собранието, ќе биде ставен и на дневен ред за гласање.
Премиерот Мицкоски веќе е известен за изборот на „Вреди“, Алиу да е министер за здравство
Сега останува договорот и за заменици министри за одбрана и земјоделство откако Елфете Исмаили и Фљакрон Беџети поднесоа оставки на функциите останувајќи во крилото на „Алијанса за Албанците“ кое го води Таравари.
Имињата на новите заменици министри ќе бидат соопштени во следниот период.
Миле А. Ристески