Редуцираниот градски превоз создаде револт кај граѓаните

Метеж на постојките, автобуските полни – редуцираниот градски превоз создаде револт кај граѓаните. Приватните автобуси нема да возат, додека ЈСП не им исплати дел од долгот кој достигна 150 милиони денари. Граѓаните оставени со часови да чекаат на жешкото време.

„Чекам 45-ка приватна ама нема. Кога ќе дојде не знам.“

„И сабајле чекав 23-ка и 45-ка ги нема. Ни вчера, ни денеска. Ќе си носиш шише вода, капата на глава и ќе си чекаш.“

„Ги укинале и тоа не е во ред, автобусите се полни. Жешко е, кој може да чека. За жалење е ова, народот е за жалење, некој треба да преземе мерки.“

„Ни државни, ни приватни, нема автобуси, еве од кога чекам“-велат граѓаните кои ги анкетиравме.

Според приватните превозници – на сметката на ЈСП, градот префрлил 40 милиони денари, но претпријатието не сака да им ги исплати бидејќи недостигал одреден документ. Велат – немаат пари за нафта, ниту за плати на возачите, затоа морале да се одлучат на овој чекор.

„Ние ги чекаме тие пари, нека ни ги уплатат и веднаш ние ќе ги вклучиме автобусите за да не чекаат граѓаните на овие пеколни температури. Директорот вели не може да ги исплати затоа што нема добиено верификувани извештаи од Градот Скопје. Со тие средства одредено време ќе можеме да возиме, сега нека ни ги пуштат парите, веднаш автобусите ќе се вклучат“, вели Јовица Зафировски, претставник на приватни превозници.

Се обидовме да стапиме во контакт со директорот на ЈСП, но тој не одговори на нашите повици. Во метрополата не сообраќаат 200 приватни автобуси, а на сајтот на ЈСП нема известување за оваа состојба. Цената од долгот кон приватните превозници најмногу ја плаќаат граѓаните.

Скопјани останаа со редуциран градски превоз откако приватните автобуси се повлекоа од сообраќај. Причина нередовните исплати на пари. Долгот на ЈСП кон трите фирми кои ги опслужуваат приватните линии достигнал речиси 150 милиони денари.

Андријана Ѓурческа