Влада: Обезбедени 50 милиони денари за нови средношколци во дуално образование

Владата обезбеди 50 милиони денари за 1.570 стипендии наменети за ученици што ќе се запишат во дуалните паралелки во учебната 2025-2026 година. Секоја стипендија изнесува 3.500 денари месечно и ќе се исплаќа во текот на девет месеци.

Мерката е дел од напорите за унапредување на квалитетот на средното стручно образование и е насочена кон намалување на невработеноста и зголемување на практичните вештини кај младите, а во обуката ќе бидат вклучени 550 компании од реалниот сектор.

„Создаваме кадри што ќе бидат подготвени за пазарот на труд, со што директно ја намалуваме невработеноста и ги охрабруваме младите да ја градат својата иднина во Македонија“, се наведува во владиното соопштение.