Македонија под вршник со високи температури
Неделава топло време, Институтот за јавно здравје со препораки за заштита на здравјето во услови на високи температури. Тимови на Црвениот крст делат вода и летоци со совети, ќе им мерат притисок на граѓаните кои ќе се пожалат на тегоби.
Скопје ќе дише на над 40 степени целзиусови, почнаа оние пеколни горештини од кои сите стравувавме. Под влијание на топла воздушна маса од југ, наместа температурата ќе се искачи над 30 степени, па дури и над 40, предупредуваат од Управата за хидрометеоролошки работи.
Високи се температурите за овој период од годината, се жалат граѓаните, кои обврските ги завршуваат рано наутро.
Мобилни екипи на Црвениот крст со лекари од 11 до 16 часот патролираат низ Скопје. Дистрибуираат вода, им мерат притисок на граѓаните кои се жалат на тегоби. За потешките случаи обезбеден и транспорт до најблиската медицинска установа.
В петок во вечерните часови се очекуваат дожд и грмежи, а пад на температурата за неколку степени ќе има за време на викендот.
Александра Спировска