Учениците успехот ќе го добиваат во електронска форма, вели Јаневска

Учениците од основното и средното образование постигнатиот успех од наредната година ќе го добиваат во електронска форма – свидетелствата заминуваат во историјата. На овој чекор надлежните биле подготвени и годинава, но од ресорот велат проблем се руралните средини, каде потребен е поголем степен на дигитализација. Министерката за образование Јаневска вели – при упис во средно или на факултет системите се поврзани, на овој начин образовните институции имаат пристап до свидетелствата и увид во успехот на ученикот.

„Лесна е процедурата, но дигиталната писменост треба да се поткрене на повисоко ниво.не очекувам од родителите да знаат, но учениците треба да знаат и наставниците треба да знаат за да им помогнат во тој процес. Сега им помага администраторот или евентуално училиштето ако има информатичар. Затоа сè уште велиме дајте ги и во хартиена форма додека населението не се подготви“, изјави Весна Јаневска – министерка за образование и наука.

Во средните училишта, во тек е вториот уписен рок . Таму каде што има пријавени повеќе ученици од предвидените места ќе се полага квалификациски испит.

„Добро е јавноста да знае, и учениците, и родителите, и наставниците – дека во еден одреден момент на животот знаењето на децата ќе се провери. Ова е еден од стимулите да знаат дека ако сакаат да учат таму каде што сакаат и да ги исполнуваат своите соништа треба да учат во младоста, а потоа и на своето работно место“, изјави Весна Јаневска- министерка за образование и наука.

Голем интерес за упис имало во стручните училишта и во неколку скопски гимназии. Во првиот уписен рок, во јуни, двојно повеќе ученици се запишале во стручна насока, отколку во гимназија.

Секоја година во земјава е алармантен бројот на првачиња. Во септември минатата година во училишните клупи седнале 17.200 првачиња, 500-тини помалку од 2023 година. За годинава статистиката ќе биде позната во септември.

Андријана Ѓурческа