Пензионирани пилоти на „ер трактори“ повторно ангажирани за гаснење пожари

Директор на дирекцијата за заштита и спасување Стојанче Ангелов потпиша договор за ангажман со двајца пензионирани пилоти за противпожарните авиони „ер трактор“. Тие ќе бидат оперативни за гаснење на опасните пожари на отворено во државава.

Вториот авион на Дирекцијата за заштита и спасување се очекува за кратко време да биде вратен од редовниот сервис од Австрија. Двајцата пензионирани пилоти и лани беа ангажирани да интервенираат во гасење на пожарите.

Државата располага со четири функционални хеликоптери за гаснење пожари, од кои три се во рамки на МВР и еден на армијата, како и три „ер-трактори“ на Дирекцијата за заштита и спасување, но тие не беа функционални.

Причина за тоа беше што двајца пилоти заминале во пензија, а имало само еден активен пилот и во таква ситуација авионите не смееле да летаат.

Од Центарот за управување со кризи информираа дека во текот на вчерашниот ден на територијата на државата имало 20 пожари на отворено, од кои два сè уште се активни.