Македонија против Србија и Исланд!

20 години по шестото место на дебитанскиот настап на Европските првенства за ракометари до 18 години, Македонија на шампионатот во Полска ќе игра за што подобар пласман од 9-то до 16-то место. Поради трите порази во првата фаза, нашата репрезентација во вториот дел од првенството ќе биде во група со Србија и со Исланд, но нема да пренесе ниту бод. Причина за тоа е неразбирливиот пад во играта во првиот меч против Русија, во којшто Македонија водеше со осум разлика, а загуби минимално. Токму во 1994-та Македонија беше совладана од „зборнаја“ во натпреварот за петтото место со 34:19. Убедливите порази од Шпанија и од Данска беа очекувани поради квалитетот на противниците.

Во новоформираната конкуренција И1, Исланд и Русија ќе стартуваат со по два бода, Македонија и Србија ќе почнат од нула, во обидот да ги освојат првите две места и да разигруваат за пласман од 9-та до 12-та позиција. Во таков случај можните противници  доаѓаат од групата И2 во којашто се Хрватска, Белорусија, Чешка и Романија.

Следниот дуел, нашите млади ракометари ќе го одиграат утре против Србија во 13 часот, а во истиот термин в среда ќе му се спротивстават на Исланд.

Во главната фаза од којашто ќе произлезат и носителите на медали, во М1 групата со по два бода влегоа Шведска и Шпанија, додека Данска и Швајцарија се без бодови.

Во предност во трката за двете позиции што обезбедуваат полуфинале, во М2 сегментот се Германија и Унгарија со по два бода во однос на Франција и на Полска кои се на нула.

Титулата од Европско првенство пред две години ја брани Германија кој во финалето беше подобра од Шведска со 30:29, додека бронзата тогаш и припадна на Данска која со 37:22 ја прегази Шпанија.

Најмногу медали на досега 11-те шампионати на стариот континент за ракометари до 18 години, освоила Данска, вкупно девет, но ниту еден златен, а три сребрени и шест бронзени. Најуспешни со по две титули и со по едно второ место, се Хрватска и Германија.