Израелскиот кабинет за безбедност го одобри планот на Нетанјаху за окупирање на Газa

Израелскиот кабинет за безбедност го одобри планот на Нетанјаху за окупирање на градот Газа-соопштија од кабинетот на премиерот.

„Израелските одбранбени сили (ИДФ) ќе се подготват за преземање на градот Газа, обезбедувајќи истовремено обезбедување хуманитарна помош за цивилното население надвор од борбените зони“-стои во соопштението.

Планот што се очекува да трае околу 5 месеци, би се спроведувал во фази со првично масовно евакуирање на цивилите од градот. Ги предвидува и петте принципи кои вклучуваат разоружување на Хамас, враќање на сите заложници, демилитаризација, израелска безбедносна контрола во Појасот и нова цивилна администрација која не е ниту Хамас ниту Палестинската самоуправа. Пред состанокот Нетанјаху изјави дека има намера да преземе воена контрола врз цела Газа, но не за да управува со неа, туку за да го уништи Хамас и да ги врати заложниците.

„Нашиот план не е да ја окупираме или анектираме Газа. Нашата цел е да го уништиме Хамас и да ги вратиме заложниците, а потоа да ја предадеме Газа на преодна влада, да имаме безбедносен периметар, не да управуваме со неа. Сакаме да го предадеме на арапските сили кои ќе го управуваат правилно, без да ни се закануваат“, изјави Бенјамин Нетанјаху, премиер на Израел.

Меѓународната заедница загрижена, бара од Нетанјаху да се откаже од планот. Присилното раселување само ќе ја влоши хуманитарната катастрофа во Газа-изјави австралиската министерка за надворешни Вонг. Секое проширување на конфликтот во Газа ќе биде катастрофално-предупредија од ОН.

„Окупацијата не може и не смее да продолжи. Тоа не е прифатено според меѓународното право. Веќе јасно ги искажавме нашите загрижености дека какво било проширување на конфликтот ќе биде катастрофално“, изјави Фархан Хак, портпарол на генералниот секретар на ОН.

Наспроти гласањето на воениот кабинет стотици израелци излегоа на протести низ повеќе градови барајќи владата да се откаже од планот, кој според семејствата, е смртна казна за заложниците. Во Тел Авив апсења и водени топови.

„Не успеавте! Мојот Матан е сè уште таму, наместо да направите единствено нешто што оваа влада не го направи – да ставите сеопфатен договор на маса што ќе ги врати сите 50-мина дома“, изјави Анат Ангрест, мајката на заложник.

Градот Газа сочинува околу 25 насто од територијата на Појасот што израелската војска сè уште не ја освоила, вклучувајќи неколку бегалски кампови во централниот дел од енклавата, каде што, според израелските проценки, се држат преостанатите заложници.

Бојана Крстевски