Продолжува затрупувањето во „Дрисла“, чадот делумно намален

Со засилено темпо продолжуваат активностите за затрупување на делот од депонијата „Дрисла“. Според директорот на Дирекцијата за заштита и спасување, Стојанче Ангелов, чадот е намален, но сè уште присутен.

Утрово со засилено темпо продолжи затрупувањето на делот од депонијата Дрисла од кој излегува чадењето а кој е со величина приближно колку фудбалско игралиште. Отворен оган не може да се забележи, чадењето е делумно намалено, но се уште присутно. Од она што можам да го забележам на лице место во депонијата Дрисла, двата земјени пристапни патишта кои во текот на вчерашниот ден беа изработени како насип низ заезерената површина од отпадни води длабока околу 1,5 метри, значително го олеснуваат пристапот до критичното место, информира Ангелов.

Според него, ангажирани се оптимален број на камиони, багери и булдожери и како што ќе се создаваат услови нивниот број ќе се зголемува.

На дивата депонија Вардариште, како што соопштува, нема горење ниту чадење, но и денес продолжува затрупувањето на критичниот канал во кој се одвиваше пожарот.