САД ставија вето на резолуцијата за помош во Газа

САД ставија вето на резолуцијата за хуманитарна помош во Газа. Нацрт-текстот предвидуваше Израел веднаш и безусловно да ги укине сите ограничувања за влез на хуманитарна помош и да обезбеди безбедна и непречена дистрибуција до населението.

„Противењето на САД на оваа резолуција не е изненадување. Таа не го осудува Хамас ниту го признава правото на Израел да се брани, и погрешно ги легитимира лажните наративи во корист на Хамас. Членовите на Советот игнорираа кога САД јасно ставија до знаење дека оваа резолуција е неприфатлива“, изјави Морган Ортагус, советник на Мисијата на САД во ООН.

Во градот Газа продолжуваат нападите од копно и од воздух. Палестинците се движат јужно по израелските предупредувања за евакуација. Израел вели дека целта е да се ослободат заложниците и да се поразат борците на Хамас.

Францускиот претседател Макрон вели дека копнената офанзива е неприфатлива и огромна грешка. Шпанскиот премиер Санчез изјави дека Израел нема да го победи тероризмот со неселективни напади врз цивили.