Условна казна од две години за Пешевска која призна вина во случајот „Онкологија“
Кривичниот суд ја изрече пресудата за доктор мери Пешевска во случајот онкологија. Откако таа призна вина за немарност, што овозможило злоупотреба на нејзиниот факсимил и несовесно лекување пациенти, Пешевска доби условна казна. Процесот против поранешниот директор на клиниката Нино Васев и уште двајца онколози, кои се изјаснија за невини продолжува...
Условна казна доби докторката Мери Пешевска, обвинета во случајот „Онкологија 1“ во којшто таа и уште неколку нејзини колеги се товарат за несовесно лекување. Судот на обвинетата и утврди казна затвор во траење од две години, но таа нема да оди во затвор доколку за пет години не го повтори делото.
На обвинетата како товар и се става небрежно соизвршителство.
Судот ги ценеше последиците од севкупноста на заедничките дејствија коишто биле преземени, а биле тешки бидејќи кај пациентите дошло до нарушување на здравјето. Обвинетата, како лекар специјалист имала должност на грижа, внимание и одговорност, дејствијата се повеќекратни и во континуитет, што дава повисок степен на одговорност. Олеснителни околности се што досега никогаш немало поплаки за неа од вработени и пациенти. Голем дел од нив се излекувани.
Случај „Онкологија 1“ за несовесно лекување пациенти, продолжува за поранешниот директор Нино Васев и двајца обвинети лекари Симонида Црвенкова и Драган Јакимовски, сите вработени на Клиниката за радиотерапија и онкологија Скопје, кои пред Судот негираа вина.
Во случајот „Онкологија 2“ за несовесно работење и финансиски криминал се теретат поранешниот медицински и економски директор на Клиниката за радиотерапија и онкологија Скопје, Нино Васев и Нехад Нухи.
Наташа Јанчиќ – Менковски