Продолжува израелската офанзива во Газа

Нов напад со дронови врз израелскиот град Еилат. Над 20 лица се повредени, од кои двајца сериозно. Армијата соопшти дека дроновите дошле од Јемен и се урнале. Хутите изминативе две години постојано напаѓаа цели во Израел со проектили и дронови, во знак на солидарност со Хамас.

„Како одговор на злосторствата што ги изврши израелскиот непријател против нашите браќа во појасот газа и агресијата против нашата земја, спроведовме успешна воена операција со две беспилотни летала постигнувајќи ја својата цел. Ова е втора операција во последните 24 часа“, изјави Јахја Сари – портпарол на војската на Хутите.

Додека продолжува израелската офанзива во Газа со нови експлозии и жртви, Нетанјаху во Њујорк ќе го искористи говорот на Генералното собрание на ОН за како што се вели, да ја каже вистината за Израел и да ги осуди лидерите кои ја признаа Палестина. Ќе се сретне со американскиот претседател Трамп и многубројни светски лидери.

„Ќе ја претставам нашата вистина, ќе ги осудам лидерите кои наместо да ги осудуваат убијците и силувачите, сакаат да им дадат држава во срцето на земјата Израел. Тоа нема да се случи. Со Трамп ќе разговарам за нашата потреба да ги исполниме целите на војната-да ги вратиме сите заложници и да го победиме Хамас“, изјави Бенјамин Нетанјаху – премиер на Израел.

Демонстранти кои протестираа на аеродромот „Бен Гурион“ против израелскиот премиер пред неговата посета на САД побараа негова смена и крај на војната. Упатија апели до претседателот Трамп за ослободување на заложниците.

„Верувам дека Нетанјаху ќе ја блокира секоја шанса за постигнување договор, за спасување на нашите заложници и за запирање на војната. Ние мора да се бориме против него, и да ја вратиме демократијата во Израел“, рече протестант.

Хамас со итно предупредување до израелското раководство дека продолжувањето на воената операција во Газа ја зголемува опасноста за заложниците и побара итно повлекување на израелските сили.

Катерина Бојаџиева