Македонија ја забрзува енергетската транзиција
АФД се приклучува кон Инвестициската платформа за праведна енергетска транзиција на Северна Македонија за поддршка на праведна, сигурна и достапна енергетска транзиција во земјата…
Министерството за енергетика, рударство и минерални суровини ја потпиша Заедничката декларација со Француската агенција за развој (AFD), со што АФД официјално беше поздравена како партнер на Инвестициската платформа и се зајакна поддршката за праведната енергетска транзиција на Северна Македонија.
„Ова партнерство ја зајакнува нашата способност да го модернизираме електроенергетскиот систем, да интегрираме повеќе обновливи извори и да ја заштитиме достапноста и сигурноста на снабдувањето. Поддршката од АФД—заедно со знаењата што ги споделуваат европските експерти—ни помага да обезбедиме континуирана и широка посветеност на енергетската транзиција на Северна Македонија, притоа ставајќи ги граѓаните и бизнисите во нејзиното средиште“, изјави министерката Божиновска.
„АФД е посветена на поддршка на праведната и одржлива енергетска транзиција на Северна Македонија. Преку Инвестициската платформа, ќе соработуваме со Владата и со другите партнери на платформата со цел да се реализираат плановите преку конкретни финансиски изводливи и спроведливи проекти што носат вистински придобивки за домаќинствата, индустријата и поширокото општество“, изјави заменик- директор на Канцеларијата на АФД за Западен Балкан, Франсоа Винс.
Ова партнерство ја илустрира амбицијата на АФД да ја поддржи Северна Македонија во нејзините напори за напредок кон членство во ЕУ. Работејќи рамо до рамо со националните власти, европските институции и другите развојни партнери, АФД придонесува за зајакнување на капацитетите на земјата да спроведува реформи, да ги модернизира клучните сектори и да се усогласува со ЕУ стандардите.