Вардар продолжи да победува во Нови Сад

Вардар триумфално ја отвори одбраната на титулата во Сеха лигата на местото каде што лано го подигна вториот трофеј во оваа конкуренција.

Во Нови Сад совладана е Војводина со 26-21,  наизглед убедливо, но не така лесно како што се очекуваше.

Аутсајдерот го доби првиот дел откако вардарци за 13 минути поведоа со 6-1, но во наредните 8 минути ја прокоцкаа предноста. Новосаѓани изедначија и возвратија со полетна игра без комплекси од звучните имиња и го добија првото полувреме со 12-10.

Во вториот дел истрча нов Вардар, со драстично поинаков пристап во играта и жар на теренот.Со цврста одбрана и рационален и ефикасен напад, за 11 минути со серија од 8-1 црвено-црните го решија прашањето на победникот.

Максималната предност ја достигнаа на девет минути пред крајот кога беше  23-16, и до крајот успеаја смирено и рутинирано да ја сочуваат за прва победа во Сеха лигата.

Брумен беше најефикасен во нашиот тим со 6 гола и со подршка од  Карачич и Дибиров кој додадоа уште по 4.

Голманот Перовиќ со 13 одбрани и Грузиецот Датакашвили со 5 гола беа најистакнати поединци во екипата на Војводина.