ДИК им ги одзеде акредитациите на осум домашни набљудувачи поради агитирање
Како што информира претседателот на ДИК, Борис Кондарко, станува збор за лица кои агитирале пред гласачки места во училиште, иако биле акредитирани како набљудувачи. Меѓу нив се и поранешни кандидати за градоначалник и советници...
Државната изборна комисија на денешната седница донесе одлука за одземање на акредитациите на осум домашни набљудувачи во Општина Шуто Оризари, поради постапување спротивно на Изборниот законик и Кодексот за набљудување.
Како што информира претседателот на ДИК, Борис Кондарко, станува збор за лица кои агитирале пред гласачки места во училиште, иако биле акредитирани како набљудувачи. Меѓу нив се и поранешни кандидати за градоначалник и советници – Елвис Бајрам, Сеат Исмаил, Валентина Бајрам, Шабан Бајрам, Габриел Бајрам, Решад Сокол, Ќамуран Реунаред и Алмир Сали.
По утврдената злоупотреба, ДИК го известила МВР и наложи избирачките одбори во Шуто Оризари да не им дозволуваат влез во гласачките места и објектите на гласање.
На седницата Комисијата решаваше и по два приговори за остварување на правото на глас. Во двата случаи е утврдено дека подносителите се запишани во Избирачкиот список и можат да гласаат до затворање на избирачките места.