Над 19.000 неважечки ливчиња во вториот круг – во Скопје секое шеснаесетто неважечко
Во вториот круг од локалните избори, одржан на 2 ноември, биле евидентирани 19.287 неважечки гласачки ливчиња или 5,6 отсто од сите употребени. Само во Град Скопје, неважечки биле 10.528 ливчиња – што претставува 6,3 проценти, односно секое шеснаесетто ливче.
Во вториот круг од локалните избори за градоначалници, што се одржа во 33 општини, според податоците од гласањето, вкупно 19.287 гласачки ливчиња се евидентирани како неважечки. Тоа претставува 5,6 отсто од вкупно 345.525 гласачи кои излегоа на гласање.
Во Град Скопје, каде што гласаа 167.575 граѓани, неважечки биле 10.528 ливчиња, односно 6,3 проценти. Споредено, речиси секое шеснаесетто ливче во Скопје било неважечко. Излезноста во главниот град во вториот круг изнесуваше 35,33 проценти, а на ниво на државата 47,16 проценти.
Во првиот круг од изборите за градоначалници, одржан на 19 октомври, беа регистрирани 53.724 неважечки ливчиња од 885.085 гласачи, што е околу 6,1 отсто. Излезноста тогаш изнесуваше 48,3 проценти.
На изборите за градоначалник на Град Скопје во првиот круг, од 232.581 гласачко ливче, 12.359 беа неважечки, со излезност од 49,04 проценти.