Низа значајни средби на Божиновска на форумот за трансатлантска енергетска соработка во Атина

Министерката за енергетика, рударство и минерални суровини, Сања Божиновска, учествуваше на министерскиот состанок што се одржа во рамки на Шестото партнерство за трансатлантска енергетска соработка (P-TEC) во Атина, со учество на министри за енергетика од повеќе од дваесет европски земји.

На маргините на самитот Божиновска оствари низа значајни билатерални средби посветени на зајакнување на регионалната соработка, инфраструктурното поврзување и диверзификацијата на енергетските извори. Освен со американскиот секретар за енергетика, Крис Рајт, и грчкиот министер за енергетика, Ставрос Папастравру, министерката Божиновска оствари средба и со министерот за енергетика на Бугарија, Жечо Станков, на која се разгледаа тековните и идните активности поврзани со регионалната енергетска соработка меѓу Македонија и Бугарија, со посебен акцент на стратешките инфраструктурни проекти во електроенергетскиот и гасниот сектор.

Двајцата министри ја истакнаа важноста на проектот East – West Transmission Corridor (EWTC) како клучна иницијатива за зајакнување на регионалната поврзаност, интеграција на пазарите и зголемување на капацитетите за обновлива енергија, во согласност со целите на Европскиот зелен договор.

Во разговорите беше подвлечена и иницијативата на Бугарија за проширување на гасната инфраструктура во близина на македонската граница, што ќе придонесе за поголема достапност и пониска цена на гасот, како и за зголемена енергетска сигурност во регионот. Во таа насока, двете страни се договорија за организирање на заедничка средба меѓу претставници на двете земји за подобра координација и размена на информации за заедничките проекти.

Божиновска имаше и конструктивна средба со извршниот директор на грчкиот независен оператор за пренос на електрична енергија (IPTO – ADMIE), г. Манусакис, на која се разговараше за продлабочување на техничката соработка и за можности за нови интерконекциски врски кои ќе придонесат за стабилен и одржлив регионален енергетски систем.

„Вниманието кон Македонија на P-TEC форумот беше јасно – тоа е потврда дека нашата земја е активен и доверлив партнер кога се зборува за енергетска стабилност, стратешки инвестиции и сигурна иднина за регионот“, изјави министерката Божиновска.

Таа изрази особена благодарност до премиерот на Грција, Киријакос Мицотакис, и до грчкиот министер за животна средина и енергетика, Ставрос Папастравру, за поддршката и вниманието што го посветија кон Северна Македонија.

На маргините на форумот, министерката разговараше и со хрватскиот министер за економија Анте Шушњар, кипарскиот министер за енергетика, трговија и индустрија Ѓоргос Папанастасиу, како и со Дите Јул Јоргенсен, генерална директорка за енергетика во Европската комисија.

Форумот P-TEC, кој ги обединува енергетските министри од 25 земји од Европа и Северна Америка, претставува водечка платформа за дијалог и координација на политиките во насока на сигурна, чиста и поврзана енергетска иднина.