Откриени 10 непотребни кардиохируршки интервенции
25 пријави се пристигнати за сомнителни случаи на кардиохируршки интервенции во државното и приватното здравство. Од анализирани 19, кај 10 е утврдено дека биле направени непотребно информираа од Министерството за здравство. Комисијата ќе влезе во сите кардиолошки клиники. Анализата доаѓа по наводите на кардиохирургот Кедев кој во јавноста излезе со изјава дека во земјава непотребно се вршат операции...
Кај десетмина пациенти непотребно биле направени кардиоваскуларни операции во приватните болници-утврдила Интерната комисија што ја формираше министерот за здравство, по алармот на кардиохирургот Сашко Кедев дека се вршат интервенции без медицинска индикација, за поголем профит. Засега, не се открива во кои клиники и од кои доктори биле направени интервенциите. Дополнително случаите ќе ги испитуваат и странски експерти.
„Нашата работа треба да заврши со професионален извештај кој ќе даде комплетна сеопфатна приказ за секој поединечен случај бидејќи се работи за човечки животи, не само за финансиски средства. Сега работевме само по пријави, пациенти кои доставиле претставка до Фондот за здравство. Приказната продолжува, ние сме малку порано од половината, уште многу имаме работиме само за овие случаи“, изјави д-р Жарко Христовски, претседавач на Интерната комисија за кардиолошки и кардиохируршки интервенции.
Останува нејасно дали овие интервенции оставиле здравствени последици врз пациентите.
„Од досегашните пријавени случаи ние заклучивме дека за поголемиот број од нив имаме неправилно упатени и неправилно оперирани пациенти“, изјави д-р Ненси Лозанче – член на Интерната комисија за кардиолошки и кардиохируршки интервенции.
Одговорноста за непотребно извршените операции ќе се утврдува откако ќе завршат проверките. Документацијата ќе се достави до надлежните институции.
„Ќе видиме дали ќе се утврдат истите 10 случаи од страна на странската комисија и тој извештај за нас ќе биде патоказ за дефинирање на политики во овој дел на здравствениот систем во државата“, изјави Азир Алиу – министер за здравство.
Сите здравствени установи каде што се изведуваат кардиоваскуларни интервенции ќе бидат цел на проверки.
Под лупа на Интерната комисија беа 25 пријави за сомнителни случаи.
За шест, Комисијата не била надлежна и пратени се во Здравствениот инспекторат. Анализирани се 19 медицински досиеја, во 10 случаи е утврдено дека непотребно се извршени операции.
Андријана Ѓурческа