Два авиона кружат над Скопје, не можат да слетаат поради силен ветер - други два пренасочени кон Пиштина

Два вечерни лета на „Виз ер“ кои требаше да слетаат на скопскиот аеродром се пренасочени кон Приштина поради неповолни услови за слетување. Полетувањата од Берлин и Ајндховен, со рути W64740 и W64716, околу 18:20 и 18:50 часот добиле насока да продолжат кон аеродромот во Приштина.

Причината за неможноста да слетаат на аеродромот во Скопје, како што попладнево соопштија од Дирекцијата за заштита и спасување (ДЗС), е силниот јужен ветер кој го зафатил Скопскиот Регион.

Други два авиони, пак, во моментов кружат над скопското небо и чекаат насоки за слетување.

„Два авиони се пренасочени за слетување кон аеродромот во Приштина, додека други два сè уште кружат и чекаат насоки за слетување“, информираат од ДЗС.

Според информациите, ветрот дува на поголема височина, поради што е отежнато слетувањето на авионите.