Откупувачите на тутун тактизираат
Откупот на тутунот сè уште не е интензивиран. Од десет, осум откупувачи сè уште не ја почнале откупната кампања, ниту најавиле кога ќе ги отворат пунктовите. Тутун купуваат само две компании, а кај тутунарите се создава притисок и недоумица…
Осум од десетте компании сè уште не го почнале откупот на тутунот. На теренот се само Прилепскиот комбинат и малата компанија „Кавекс“ од Неготино. Ниту од Сојузот на земјоделски здруженија не знаат зошто откупувачите молчат и тактизираат.
Ова создава притисок, недоумица и несигурност кај тутунарите. Откупувачите ги користат законските можности со кои имаат рок до 15-ти декември да ги отвортат пунктовите. Токму ова иницира да се бараат законски измени до година за прецизен датум за почеток на откупната кампања.
Годинашнава реколта тутун се проценува на 22.000 до 24.000 тони со висок квалитет. Двете компании досега презеле околу 300 тони тутун по просечна цена од 420 денари.
Елизабета Митреска