Институционални предизвици за лицата со попреченост

Државата има само едно средно училиште за лица со оштетен слух. Во „Паретенија Зографски“ годишно настава посетуваат околу 50-тина ученици. Дел од нив, образованието го продолжуваат на факултетите, други успешно водат сопствен бизнис. Предизвик на училиштето е ресурсниот центар каде се обучуваат образовни асистенти, а со чија помош средношколците ќе можат да посетуваат настава во градот каде живеат.

„Во делот на образованието направен е голем исчекор освен учениците што добиваат учење и изучување на различни струки и вештини и занимања, добиваат и вертикална проодност, односно можат да се запишуваат на факултетите голем дел од нив тоа и го правата. А еден дел се и наши колеги“, изјави Слободанка Џеповска – директорка на средното училиште со ресурсен центар „Партенија Зографски“.

Кога би имало училишта за лица со попреченост, во повеќе градови, би било полесно за семејствата и за учениците.

„Знаковниот јазик може да се научи. Во иднина би можеле да размислуваме реформски, може би е тоа и поевтино, а и многу пологично и похумано, во секое средно училиште да имаме експерт за знаковен јазик, да можат учениците на ваков начин тоа што го предава некој да го дознаат“, изјави Гордана Сиљановска Давкова – претседател на државата.

Првите години од животот се клучни за развојот на децата. Министерството за здравство, за социјална политика и за образование ќе воспостават систем за рана детекција на потешкотиите во развојот на детето. Се обучуваат тимови во здравствените установи, и ќе се прави скрининг на сите деца до шестгодишна возраст.

Андријана Ѓурческа