Брзината главната причина за сообраќајни несреќи со смртни последици, покажува статистиката на МВР

Пребрзото возење е главна причина за сообраќајни несреќи со смртни последици во земјава – покажува статистиката на МВР. Само лани имало 142 жртви, а изминатата деценија ипол немало година без најмалку 100 загинати. Надлежните очекуваат системот „безбеден град“ да стави ред во сообраќајниот хаос, а бројот на жртви да се намали. Податоците од првите неколку дена покажаа дека прекршоците се значително опаднати …

Освен брзината, причина за сообраќајките со смртен исход се и непочитувањето на сигнализацијата и на сообраќајните правила, како и возење под дејство на алкохол и опојни дроги.

Геаѓаните со свои ставови:

„Многу се внимава дури и тие што возеа брзо сега внимаваат“.

„Подобро се вози, попрегледно е“.

„На семафорите и на брзината се внимава, само треба да се вратат тајмерите што ги имаше“.

„Има милион други работи што треба да се средат пред ова. Има зони каде што е дозволено 30, нормално дека таму нема да возиш 90. И без да ги стават камерите тоа се почитувало“.

„Цел живот ќе возиме со стрес. Требаше вакви мерки, ама барем до 60 да биде“.

Статистиката покажува дека годишно има и над 4000 илјади сообраќајни несреќи.

Возењето со брзина над дозволената и натаму е главна причина за сообраќајни несреќи кои завршуваат со смрт, тешки повреди и материјална штета. Дека неприлагодената брзината е сериозен проблем на македонските патишта се потврди и со пробната примена на проектот „Безбеден град“.

Македонија ја заостри казнената политика и го воведе делото „безобѕирно управување со моторно возило“, а во новата година ќе почне и казнувањето со помош на камерите на „Сејф сити“. Законските измени се веќе во собрание, но неизвесно е дали ќе бидат донесени до нова година, или пробниот период ќе продолжи уште некое време.

 Андријана Ѓурческа