ДЗР утврди неправилности во Лотарија во времето на СДСМ и ДУИ
Нередовна уплата на дневниот пазар, 75 лица кои не доаѓале на работа, а земале плата, незаконски трошоци за службени патувања, неправилности со објектите под закуп и тендерите – Државната ревизија изрази сомнеж за работењето на Државна лотарија кое укажува на можни злоупотреби на јавни средства од 2 милиона евра...
Утврдени сериозни неправилности, сомнителни исплати на добивки и злоупотреба на огромна сума пари во Државна лотарија, утврди Државниот завод за ревизија за 2024. Станува збор за злоупотреби од 2 милиони евра. Дополнително, дневниот пазар од продажба на лотариски игри изнесувал близу 750.000 евра, но не бил редовно уплатуван на сметките на друштвото. Недостасува благајнички дневник и документација за готовински трансакции, што го прави процесот непрегледен и ризичен.
Според првиот ревизор Максим Ацевски, недостигот на контроли и нефункционалната внатрешна ревизија отвораат сомнеж за незаконско работење.
Со 60-70 ревизии годишно ДЗР е клучен елемент во транспарентно управување со јавните пари. Според министерката за финансии, институциите мора да соработуваат за да нема злоупотреби.
На ниво на цела година биле регистрирани само две уплати, во април и во декември, кои, според утврденото, не претставуваат реален дневен промет, туку префрлање пари помеѓу внатрешни сметки.
Трошоците за реклами достигнале над 3.582.811 евра, десетпати повеќе од 2020 година.
Дополнително, утврдени се неправилности кај јавни набавки, договори за дури 75 луѓе кои земале пари без да работат и службени патувања без доказ. За утврдените неправилности, ревизорите ги известиле надлежните органи за понатамошно постапување.
Борис Грујоски