Ново раководство и промени во Извршниот комитет на СДСМ
Со новоизбраните кадри во раководството и органите на партијата на СДСМ, лидерот Филипче најавува тим кој ќе стави крај на политиките на власта. Според владејачката партија именуваните се стари кадри кои со себе влечат скандали и неуспеси во досегашните политички кариери.
Екс-министерката за труд и социјала Јована Тренчевска и кандидатот за градоначалник на Аеродром, ортопедот Александар Трајановски се новите потпретседатели на СДСМ. Александар Саша Димитриевиќ останува генерален секретар, а Љупчо Фармаковски организациски секретар на партијата.
Промени и во извршниот комитет на опозициската партија, каде Дејан Николовски, Јон Фрчковски, Петар Огненовиќ се нови, а остануваат досегашните членови Симона Цветановска, Рената Младеновска, Андреј Жерновски. Новоизбраните кадри во раководството и органите на партијата според лидерот Филипче, се тимот што ќе стави крај на политиките на власта.
Новото раководство е комбинација на искусни и млади кадри, потенцираат од „Бихачка“.
Според ВМРО-ДПМНЕ, во новото раководство на СДСМ се избрани стари кадри одредени од екслидерот Зоран Заев, кој со себе влечат скандали и неуспеси во досегашните политички кариери.
Ирина Гелеска