Во Боливија полицијата тепа деца што бараат работа

Дојдоа со играчки во рацете, но беа пречекани со пендреци. 150 деца се судрија со боливиската полиција пред Парламентот во Ла Пас. Протестираа против измените на законот за труд – забрана за работа на деца помали од 14 години. Некои не беа повисоки од метро и жилет, но бараа да им се дозволи да работат, ако е доброволно. За нив тоа не е експлоатација, туку опстанок.

„Мораме да работиме за да им помогнеме на родителите. Имам три помали братчиња и сестричиња, а сега ќе добиеме и четврто. Родителите немаат пари за се. Моите постари браќа работат и се понезависни. И јас морам да заработам за школување и за малечката сестричка“, објаснуваат малите демонстранти.

Пратениците рекоа – не. И исто како возрасните се обидоа да ги поминат блокадите. Но полициската рака е тешка и не бира каде паѓа. Како да немаат деца, туку гневна толпа пред себе, полицајците ги извадија пендреците и солзавецот.

„Протестираме мирно. Ние сме деца и си ги бараме правата – да не ни ги укинат работните места. Овие гадови употребија солзавец против нас“, обвини едно од децата.

Во сиромашната Боливија  децата уште од најмала возраст им помагаат на семејствата, на плантажите и во работилниците и често се жртвуваат за помалечките. Сметаат дека ако државата им ја одземе работата, тогаш им ги одземала образованието и иднината.

Ивана Салтировска