Можен договор за Украина во следните 90 дена?

Празничната магија носи радост и светлина во многу домови, но некаде божиќните ѕвезди осветлуваат страв и неизвесност. Додека семејствата ширум светот го слават Божиќ со песни, подароци и миси, Украинците во сенка на војната, уште една година го дочекаа празникот со желба за мир.

„Сè што гледате околу нас, сè што свети и трепка, работи на генератори. Ја презедовме одговорноста да го направиме празникот и покрај темнината и покрај предизвиците. Детството не може да се одложи“, изјави Евхен Мушкин – генерален директор на украинскиот Експоцентар.

„Денес сите треба да бидат расположени бидејќи живееме во многу тешки времиња. Најважната желба е нашата земја да биде слободна, војната да заврши, а нашите момчиња да се вратат дома“, изјави Володимир Иванович – жител на Киев.

„Многу е тешко да се најде сила по вакви напади, но имам две деца и морам да најдам сила да се расположам и да бидам среќна. Да имам надеж дека сè ќе биде во ред“, изјави Мархарита Саенко – раселена од регионот Суми.

И покрај тешките времиња, Украина останува обединета – изјави Зеленски во божиќното обраќање, изразувајќи надеж дека добрината и вистината на крајот ќе преовладаат.

„И покрај сите страдања што ги донесе Русија, таа не е способна да го окупира или бомбардира она што е најважно-нашето украинско срце, нашата вера едни во други и нашето единство. Она што е важно сега не е како го украсуваме нашиот дом, туку како го браниме. Кога се обраќаме кон Бога, секако, бараме нешто поголемо. Бараме мир за Украина. Се бориме за него. И се молиме за него. И го заслужуваме“, изјави Володимир Зеленски – претседател на Украина.

Воздушните тревоги сепак, продолжија да го параат празничниот воздух со сирени во Киев и соборени дронови кон Москва. И покрај борбите, американскиот пратеник во НАТО тврди дека страните се поблиску до мир од кога било, но дека „топката е во дворот на Русија“. Смета дека договор е можен во следните три месеци, но предупредува на тешки финалните преговори и сурова зима за Украина.

„Страните се приближуваат кон договор. Ако нешто биде направено, ќе биде во следните 90 дена. Трамп е клучен посредник кој може да ги донесе страните на преговарачка маса и да истрае во обидите за постигнување мир. задачата на САД не е само да се осигурат дека договорот е потпишан, туку дека е фер и праведен, дека обезбедува траен мир и дека Украинците „не живеат во страв“ од можноста за нова инвазија“, изјави Метју Витакер – претставник на САД во НАТО.

Зеленски го објави мировниот план од 20 точки и најави можно повлекување на украинските трупи од истокот, доколку и Москва се повлече и областа стане демилитаризирана зона под меѓународен надзор. Планот ги опфаќа Донбас и нуклеарната централа Запорожје и би одел на референдум. Сепак, „Блумберг“ објави дека Кремљ го отфрла предлогот и бара дополнителни услови-неутрален статус на Украина и запирање на проширувањето на НАТО.

Бојана Крстевски