Пораз на македонските ракометари на контролата со Хрватска

Македонската машка ракометна репрезентација вчеравечер претрпе пораз во контролниот дуел со Хрватска (подмладен состав) во Пореч со 26:23 (14:11). Ова беше првиот подготвителен дуел за македонските ракометари за Европското првенство 2026.

По изедначениот почеток резултатот последен пат беше нерешен 7:7 во 15 минута, а потоа Хрватска направи серија од 5-1 и во 24.минута резултатот беше 12:8. На стартот од вториот дел противникот ги имаше и највисоките +5 (16:11), но избраниците на селекторот Кирил Лазаров успеаја во последните десет минути да намалат и на еден негатива. Сепак Хрватска не дозволи изедначување на резултатот.

Најефикасен на дуелот беше Филип Кузмановски со 7 голови, додека најдобар играч на дуелот беше голманот на Хрватска Дино Славиќ со 15 одбрани.

Македонскиот национален тим уште два дена останува во Пореч каде ќе тренира, а по Нова година ќе следува нов собир и подготовки во Скопје. Од 8-10 јануари македонската репрезентација ќе учествува и на турнир во Швајцарија каде ќе одигра три натпревари пред заминувањето за Хернинг, Данска.