Обнова на возниот парк на Железница
Македонската железница се модернизира. Со 21 милион евра ќе се набавуваат пет електрични локомотиви за товарниот транспорт. Претпријатието очекува зголемени приходи, стопанството повисока конкурентност…
Македонски железници- Транспорт купува нови локомотиви. Во Владата потпишан договор за заем од Европската банка за обнова и развој во износ од 20,9 милиони евра. Ќе се набавуваат пет електрични локомотиви со резервни делови, а целта е поголем транспорт на стоки и генерирање приходи на претпријатието. Проектот, според премиерот, е важен чекор кон модернизација, како и кон унапредување на сигурноста и ефикасноста на товарниот железнички сообраќај.
Според министрите за транспорт и за финансии, Александар Николоски и Гордана Димитриеска-Кочоска, потпишувањето на Договорот е клучен чекор за целосната трансформација на Железница во модерно претпријатие кое ќе одговори на потребите на комитентите.
Условите под кои се обезбедени средствата – долгорочен рок на отплата, поволен грејс период и конкурентна каматна стапка, се во целосна согласност со стратегијата за одговорно управување со јавниот долг и обезбедување одржливи јавни финансии.
Новата инвестиција е клучна за развојот на Коридорите 10 и 8, но и за проектот за градски воз во Скопје.
Борис Грујоски