Семејството Клинтон подготвено да сведочи пред Комитетот за Епстин

Поранешниот претседател Бил Клинтон и неговата сопруга и поранешна државна секретарка Хилари Клинтон се согласија да сведочат во конгресната истрага за Џефри Епстин, за да избегнат кривична одговорност поради непочитување на судот. Двајцата сопружници претходно одбија да сведочат и обвинија за политички мотивирана истрага.

„Тие преговараа со добра намера. Вие не преговаравте. Ви кажаа под заклетва што знаат, но не ви е гајле. Но, поранешниот претседател и поранешниот државен секретар ќе бидат таму. Тие со нетрпение очекуваат да постават преседан што важи за сите“, објави портпаролот на Клинтон, Анхел Урења, обраќајќи му се на претседателот на Надзорниот дом, Џејмс Комер.

Бил рече дека го познавал Епстин, но негираше дека знаел за злосторствата. Ова ќе биде прво сведочење на поранешен претседател пред Конгресот од 1983 година. Актуелниот шеф на Белата куќа одново негираше дека има врски со престапникот.

„Немав никаква врска со овој човек. Но, да, тоа е ужасна работа. Знаете, кога Епстин беше жив, никој не се грижеше за тоа. Но, сега навистина го возвраќаат ударот затоа што бил Клинтон е толку голем дел од тоа. Демократите го туркаат тоа. А проблемот е што се покажува дека демократите беа со Епстин и коваа заговор со него“, изјави Доналд Трамп, претседател на САД.

Новообјавените милиони документи за покојниот милијардер открија негови врски со членови на кралски семејства, глобални американски, но и европски политички фигури. Полска ќе формира група за анализа на сите потенцијални последици од досието „Епстин“ врз Полска.

„Се појавија првите информации во врска со лица кои, на пример, го информирале господинот Епстин во Краков дека веќе имаат група полски жени или девојки. Има повеќе од овие траги, па затоа ќе побарам и од обвинителите и од тајните служби детална, брза анализа, датотека по датотека, на секој документ што е достапен во јавноста“, изјави Доналд Туск, премиер на Полска.

Норвешкиот парламент гласаше за задржување на монархијата, отфрлајќи го предлогот за воспоставување република. Одлуката доаѓа по објавувањето на нови детали во врска со контактите на крунската принцеза Мете-Марит со Епстин и почетокот на судењето против нејзиниот син, Мариус Борг Хејби, по обвиненија за силување и семејно насилство.

„Верувам дека ако некој ја слушаше дебатата, луѓето би разбрале дека станува збор за формата на владеење. И ова се важни принципи кои мора да бидат независни од моменталниот медиумски пејзаж“, изјави Масуд Гаракани, претседател на Стортингот.

Џефри Епстин изврши самоубиство во затворска ќелија во Њујорк во август 2019 година додека чекаше судење за обвиненија за трговија со луѓе. Во 2021 година, неговата поранешна партнерка на Гислејн Максвел, беше осудена за трговија со луѓе на 20 години затвор.

Маријана Димовска