Над 2.900 спортисти од 90 земји на стартот на ЗОИ 2026

Во Милано, Кортина д’Ампецо, Предацо и Ливињо со церемонии на четири локации – – вечерва во Италија официјално ќе бидат отворени 25. Зимски олимписки игри Милано – Кортина 2026.

На Игрите ќе настапат околу 2.900 спортисти од повеќе од 90 земји. Македонскиот олимписки тим е составен од четворица натпреварувачи: алпските скијачи Јана Атанасовска и Виктор Петков, како и нордијците Ставре Јада и Ана Цветановска.

Главната свечена церемонија ќе почне во 20 часот на стадионот „Џузепе Меаца“ во Милано, додека паралелни настани ќе се одржат и во Кортина и Предацо. Македонското знаме во Кортина ќе го носи Јана Атанасовска, а во Предацо знаменосец ќе биде Ставре Јада.

Најмладата членка на македонската делегација, 19-годишната Атанасовска, ќе настапи во дисциплините слалом и велеслалом, каде во машка конкуренција ќе се натпреварува и 26-годишниот Петков. Најискусен во тимот е 27-годишниот Јада, кому ова ќе му биде трет олимписки настап, а ќе се натпреварува во нордиските трки – спринт и 10 километри интервал старт. Во истите дисциплини во женска конкуренција ќе настапи и 25-годишната Цветановска, на својата втора Зимска олимпијада по Игрите во Пекинг 2022.

Настапите на македонските нордијци се закажани за 10, 12 и 13 февруари, додека алпските дисциплини ќе се одржат на 14, 15 и 18 февруари.

Натпреварите во хокеј, уметничко лизгање и брзо лизгање ќе се одржуваат во Милано, додека Кортина д’Ампецо ќе биде домаќин на женското алпско скијање, санкање, боб, скелетон и карлинг. Бијатлонските трки ќе се одржат во Антхолц, а натпреварите во скијачки скокови, нордиска комбинација и крос-кантри скијање во Вал ди Фиеме.

Во Ливињо ќе се одржат натпреварите во сноубординг и скијање слободен стил, додека Бормио ќе биде домаќин на машкото алпско скијање, како и на новата олимписка дисциплина – скијачко планинарење.

Зимските олимписки игри 2026 ќе завршат на 22 февруари со свечена церемонија во античката арена во Верона.

Фото: / olympics.com/en/milano-cortina-2026