Четворица професионални војници заболени од шуга

Кај уште двајца професионални војници од велешката касарна е детектирана шуга, со тоа бројот на заразени се зголеми на четири лица. Сите на домашно лекување, во добра здравствена состојба и примаат терапија. Под шестнеделен надзор ќе бидат војниците што имале контакт со заразените, тоа е максималниот период на инкубација на ова инфективно заболување.

„Тоа не е карантинско заболување, потребно е само болниот да биде издвоен и да биде на домашно лекување, да има посебен кревет посебно легло. Друга поголема изолација не е потребна. Секојдневно ги следиме останатите слушатели на курсот, секојдневно ги прегледуваме, тие што имаат промени, симптоми веднаш се упатуваат на специјалист на дополнителен преглед, за сега немаме такви“, изјави потполковник д-р Лариса Оранска – епидемиолог на Воено медицинскиот центар.

Во велешката касарна има 295 лица – во текот на викендот е извршена дезинфекција. Доколку војниците забележат кожни промени треба да пријават. Се преземаат мерки да се спречи ширење на заразата.

Од воено – медицинскиот центар и од армијата тврдат дека изворот на заразата не потекнува од велешката касарна. Досега во армијата, ниту во центрите за обука немало појава на шуга – еднаш во месецот се прави редовен хигиенско – епидемиолошки надзор во сите касарни.

„Сакам да се дезинформираат сите оние информации кои излегуваат во јавноста дека условите не се како што треба. Тие се војнички услови за сместување и ред. Нормално дека има топла вода но мораме да запазиме дека тоа се војнички услови, посебен ред, посебен план за капење и доколку се почитува тоа нема да има никаков проблем“, истакна потполковник Дарко Стерјовски – началник на Канцеларијата за односи со јавноста.

Кожното заболување во велешката касарна е дијагностицирано во четвртокот. Се пренесува преку контакт со заразено лице или преку постелнина, пешкири кои претходно биле користени од инфициран.

Андријана Ѓурческа