Зеленски: Мора да бидеме слушнати од Европа и САД
Зеленски ја истакна важноста Украина да биде слушната од Европа и САД во текот на мировните напори и престојната Минхенска безбедносна конференција...
Руските дронови и ракети продолжуваат да напаѓаат цели во Украина, додека Киев најавува реорганизација на воздушната одбрана и зајакнување на армијата. Зеленски ја истакна важноста Украина да биде слушната од Европа и САД во текот на мировните напори и престојната Минхенска безбедносна конференција.
„Се подготвуваме за два безбедносни настани неделава. Ќе бидат објавени нови пакети за поддршка на нашата одбрана. Важно е сигналите на Украина да бидат слушнати од Европа, слушнати од Америка и од сите наши партнери“, изјави Володимир Зеленски, претседател на Украина.
ЕУ, пак, составува список на отстапки што Русија треба да ги направи за одржлив мир, обвинувајќи ја Москва за несериозност, додека Русија тврди дека безбедносните гаранции за Киев го продолжуваат конфликтот, нагласувајќи го приоритет за отстранување на воените закани и решавање на територијалните прашања.
„Ги гледаме корените на причините и сме подготвени да ги решиме. Нема потреба да ја внесуваме Украина во НАТО. И територијалното прашање мора да се реши врз основа на реалностите што се развиле, земајќи ја предвид волјата на луѓето што живеат на овие земји“, изјави Сергеј Лавров, министер за надворешни работи на Русија.